གོ་ལའི་ཁྱོན་ལ་ཞི་བདེ་གོང་མཐོ་ཡོང་ཆེད།
ལས་གཞིའི་ཁྱབ་ཁོངས་འདི་བཞི་བརྒྱུད་ནས། ༡༠༨ཞི་བདེ་ལྟེ་གནས་ནས་འཛམ་གླིང་ས་ཕྱོགས་གང་སར་གནས་པའི་མཉམ་ལས་བྱེད་འདོད་མཁན་གྱི་གྲོགས་ཕོ་མོ་དང་དེ་བཞིན་རྒྱལ་སྤྱིའི་ཚོགས་སྡེ་ཁག་གི་མི་སྣ་རྣམས་ལ་གལ་ཆེའི་ལས་གཞི་འདིར་མཉམ་ཞུགས་དང་ཆ་ཤས་ལེན་པའི་འབོད་སྐུལ་བྱེད་བཞིན་ཡོད།
ང་ཚོས་དུས་རབས་ཉེར་གཅིག་པའི་རྙོག་འཛིང་ཆེ་བའི་དཀའ་ངལ་ཁག་ལ་གདོང་ལེན་བྱ་རྒྱུའི་དམིགས་ཡུལ་འཛིན་གྱི་ཡོད།
ང་ཚོའི་སྐོར།
ལོ་རྒྱུས།
༡༠༨ཞི་བདེ་ལྟེ་གནས་འདི་ནི། དབུས་བོད་མིའི་སྒྲིག་འཛུགས་ཀྱི་སྲིད་ཟུར་འབུམ་རམས་པ་བློ་བཟང་སེང་གེ་མཆོག་གིས་ཕྱི་ལོ་ ༢༠༢༣ ཟླ་ ༡༢ པར་གསར་འཛུགས་གནང་ཞིང་། ཨ་རིའི་མངའ་སྡེ་མཱ་ས་ཆོས་སར་ཁུལ་དུ་ཁྲིམས་དོན་ 501(c)(3) འོག་དེབ་སྐྱེལ་བྱས་པའི་ཁེ་མེད་ཀྱི་ཚོགས་པ་ཞིག་ཡིན། ལྟེ་གནས་འདི་ནི། མི་དང་རང་བྱུང་ཁམས་དབར་གྱི་འབྲེལ་བ་དང་དེ་བཞིན་ཞི་བདེ་དང་སྤྱི་སྙོམ་གྱི་རྩ་དོན་མཚོན་ཞིང་། རིག་གནས་སྣ་ཚོགས་ཁྲོད་གལ་ཆེན་པོར་གྱུར་པའི་ཨང་གྲངས་༡༠༨ཀྱི་ལམ་སྟོན་གྱི་སྐུལ་འདེད་འོག་འཆར་འགོད་བྱས་པ་ཞིག་ཡིན།
ང་ཚོའི་འཆར་སྣང་།
༡༠༨ཞི་བདེ་ལྟེ་གནས་ཀྱི་འཆར་སྣང་ནི། ཕུགས་བསམ་ཙམ་མ་ཡིན་པར་དངོས་ཡོད་འཚོ་བའི་ཁྲོད་ནས་མི་སྒེར་རེ་རེ་དང་འཛམ་གླིང་སྤྱི་ཡོངས་སུ། རང་དབང་དང་། ཞི་བདེ། དེ་བཞིན་ཡུན་གནས་ལྡན་པའི་འཇིག་རྟེན་ཞིག་བསྐྲུན་རྒྱུ་དེ་ཡིན།
ང་ཚོའི་འཆར་གཞི།
༡༠༨ཞི་བདེ་ལྟེ་གནས་ཀྱི་ངོས་ནས་ང་ཚོའི་དུས་རབས་འདིའི་ཛ་དྲག་ཆེ་ཤོས་ཀྱི་དཀའ་ངལ་ཁག་ལ་གདོང་ལེན་བྱ་རྒྱུའི་ཆོད་སེམས་བརྟན་པོ་ཡོད་ལ། ང་ཚོས་༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚེའི་མཛད་པ་འཕྲིན་ལས་ཐོབ་པའི་སེམས་ཤུགས་དང་སྐུལ་འདེད་འོག ང་ཚོས་ཐབས་མཁས་དང་མཉམ་ལས་རང་བཞིན་གྱི་ཐབས་ལམ་བརྒྱུད་ནས། རང་དབང་དར་སྤེལ་དང་། མང་གཙོའི་རིན་ཐང་གོང་སྤེལ། གནམ་གཤིས་འགྱུར་ལྡོག་གི་སྲུང་སྐྱོབ་ལས་འགུལ། དེ་བཞིན་འགན་འཁྲི་ལྡན་པའི་འགོ་ཁྲིད་ནུས་རྩལ་གྱི་ལས་གཞི་བཅས་གཙིགས་སུ་བཟུང་ཡོད།
ལས་གཞིའི་ཁྱབ་ཁོངས།
༡༠༨ཞི་བདེ་ལྟེ་གནས་ནས་རང་དབང་དང་། མང་གཙོ། གནམ་གཤིས་ལས་འགུལ། དེ་བཞིན་འགོ་ཁྲིད་ནུས་རྩལ་བཅས་གལ་གནད་ཆེ་བའི་ལས་གཞིའི་ཁྱབ་ཁོངས་བཞིའི་ཐོག་ནས་གོ་ལའི་གལ་ཆེའི་གནད་དོན་རྣམས་སེལ་ཐུབ་ཐབས་བྱེད་པའི་དམིགས་ཡུལ་བཅངས་ཡོད་ལ། བོད་ཀྱི་བླ་ན་མེད་པའི་དབུ་ཁྲིད་༸སྤྱི་ནོར་༸གོང་ས་༸ཏཱ་ལའི་བླ་མ་སྐུ་ཕྲེང་བཅུ་བཞི་པ་ཆེན་པོ་མཆོག་གི་སྐུ་ཚེ་དང་མཛད་རྗེས་ཀྱི་སྒུལ་ཤུགས་དང་སྐུལ་འདེད་འོག་ནས། ང་ཚོས་མངོན་གྱུར་བྱེད་ཐུབ་པའི་ཤེས་རྟོགས་དར་སྤེལ་བྱས་ཏེ། ཞི་བདེ་ལྡན་པའི་འཛམ་གླིང་ཞིག་ཡོང་བར་འབད་བརྩོན་བྱེད་ཀྱི་ཡོད། ལས་གཞི་ལེགས་འགྲུབ་ཀྱི་ཆེད་དུ་སྟེང་ཞབས་དང་འཕྲེད་ཞེང་གི་ཐབས་ལམ་གཉིས་ཟུང་དུ་འབྲེལ་བའི་མནྜལ་གྱི་བཀོད་པ་དཔེ་རུ་བླངས་ཏེ། ང་ཚོས་ལས་གཞིའི་ཁྱབ་ཁོངས་བཞིའི་ཁྲོད་དུ་གལ་ཆེ་བའི་འགྱུར་ལྡོག་ཅིག་འབྱུང་བར་རེ་སྨོན་བྱེད་ཀྱི་ཡོད།
དྲྭ་ཚིགས་འདི་ཉིད་གསར་དུ་བཏོན་པའི་དུས་རིམ་རྗེས་མའི་ནང་། ང་ཚོས་༡༠༨ཞི་བདེ་ལྟེ་གནས་ཀྱི་གཞི་རྩའི་སྒྲོམ་གཞི་བཞི་སྟེ། རང་དབང་དང་། མང་གཙོ། གནམ་གཤིས་ལས་འགུལ། འགོ་ཁྲིད་ནུས་རྩལ་བཅས་ལ་གཏིང་ཟབ་པོ་འཇུག་ཐུབ་པའི་ཤོག་ངོས་མང་བ་ངོ་སྤྲོད་བྱ་རྒྱུ་ཡིན།
རང་དབང་།
རང་དབང་གི་ལས་གཞི་ནི། ང་ཚོའི་ལས་གཞི་ཐམས་ཅད་ཀྱི་དཀྱིལ་སྙིང་དུ་གྱུར་ཡོད་ཅིང་། འདི་ནི་ཆོས་དད་རང་དབང་དང་མི་སྒེར་གྱི་ཐོབ་ཐང་སྲུང་སྐྱོབ་བྱེད་པའི་བློ་བརྟན་འགྱུར་མེད་ཀྱི་ཆོད་སེམས་ཤིག་ཀྱང་ཡིན། ལས་གཞི་འདིས་དད་ལྡན་མང་ཚོགས་ཀྱིས་གཞན་གྱི་ཐེ་ཇུས་མེད་པའི་སྒོ་ནས་རང་ལམ་རང་གིས་འདེམས་ཆོག་པའི་ལྷན་སྐྱེས་ཀྱི་ཐོབ་ཐང་སྲུང་སྐྱོབ་ལ་རམ་འདེབས་བྱ་རྒྱུ་ཡིན་ལ། ལྟེ་གནས་འདིའི་དམིགས་ཡུལ་ནི། ཆོས་དད་རང་དབང་དར་སྤེལ་དང་། ནང་པའི་ཆོས་ལུགས་ཁྲོད་རྩ་ཆེ་བའི་ཡང་སྲིད་ཕེབས་ཕྱོགས་ཀྱི་ལམ་ལུགས་སྲུང་སྐྱོབ། དེ་བཞིན་ཆོས་དད་རང་དབང་དང་རང་ཐག་རང་གཅོད་ཀྱི་ཡོངས་ཁྱབ་རྩ་དོན་གཙིགས་སུ་བཟུང་ནས་ལས་གཞི་སྤེལ་རྒྱུ་དེ་ཡིན།
མང་གཙོ།
ཚོགས་པ་འདི་ཉིད་ཀྱི་ཚོགས་གཙོ་དང་གསར་འཛུགས་གནང་མཁན་འབུམ་རམས་པ་བློ་བཟང་སེང་གེ་མཆོག་གི་བཙན་བྱོལ་བོད་མིའི་མང་གཙོའི་སྐོར་གྱི་འབུམ་རམས་པའི་ཞིབ་འཇུག་ཆེད་རྩོམ་དང་། ཁོང་གིས་མི་ལོ་བཅུ་ཕྲག་གཅིག་རིང་བཙན་བྱོལ་གྱི་མང་གཙོའི་གཞུང་གི་དབུ་ཁྲིད་མཛད་པའི་ཉམས་མྱོང་ལ་གཞི་བཅོལ་ཏེ། ༡༠༨ཞི་བདེ་ལྟེ་གནས་ཀྱིས་མང་གཙོའི་སྲོལ་རྒྱུན་མེད་པའི་ཡུལ་ལུང་དུ་མང་གཙོའི་ནུས་སྟོབས་གསལ་འདོན་བྱས་ནས་མི་གཅིག་དབང་འཛིན་ལམ་ལུགས་ལ་རང་བཞིན་གྱི་རྒོལ་ལན་སློག་པའི་ལས་འགན་ཐུན་མོང་མ་ཡིན་པ་དྭང་དུ་བླངས་ཡོད། ༡༠༨ཀྱི་མང་གཙོའི་ལས་གཞི་འདིའི་དམིགས་ཡུལ་ནི། སྤྱིར་མང་གཙོ་དར་སྤེལ་གཏོང་བ་དང་ཡང་སྒོས་སུ་སྐྱབས་བཅོལ་བ་དང་བཙན་བྱོལ་མི་མང་གི་ཁྲོད་དུ་མང་གཙོའི་གོ་རྟོགས་སྤེལ་བ་དང་ལག་ལེན་གྱི་ཡོ་བྱད་མཁོ་སྤྲོད་བྱ་རྒྱུ་དེ་ཡིན།
གནམ་གཤིས་ལས་འགུལ།
༡༠༨ཞི་བདེ་ལྟེ་གནས་ཀྱིས་སའི་གོ་ལའི་སྣེ་གསུམ་པ་དང་། འཛམ་གླིང་གི་ཡང་རྩེ། ཨེ་ཤེ་ཡའི་ཆུ་མཛོད་བཅས་སུ་འབོད་པའི་བོད་ཡུལ་ལ་འཕྲད་བཞིན་པའི་སྐྱེ་ཁམས་ཁོར་ཡུག་གི་དཀའ་ངལ་ལ་གདོང་ལེན་བྱ་རྒྱུ་གལ་གནད་གཙོ་བོར་འཛིན་བཟུང་ཡོད་ལ། བོད་ཀྱི་ཐུན་མོང་མ་ཡིན་པའི་ཁོར་ཡུག་གི་གནས་བབ་ཀྱིས་ཉག་ཕྲ་བའི་སྐྱེ་ཁམས་ཁོར་ཡུག་དང་དེ་དག་ལ་བརྟེན་པའི་མི་སྡེའི་སྤྱི་ཚོགས་ལ་གནམ་གཤིས་འགྱུར་ལྡོག་གིས་ཤུགས་རྐྱེན་ཆེན་པོ་ཐེབས་པའི་སྐོར་ལ་གལ་གནད་ཆེ་བའི་གོ་རྟོགས་མཁོ་སྤྲོད་བྱེད་ཐུབ། ༡༠༨ཀྱི་གནམ་གཤིས་ལས་འགུལ་གྱི་དམིགས་ཡུལ་ནི། ཁོར་ཡུག་སྲུང་སྐྱོབ་ཀྱི་ཆེད་དུ་གོ་ལ་ཧྲིལ་པོའི་མཉམ་ལས་དང་རྒྱུན་སྲིང་ཐུབ་པའི་རིག་གནས་ཀྱི་ལག་ལེན་གཙིགས་སུ་བཟུང་ཏེ། གནམ་གཤིས་ཀྱི་ཉེན་ཁ་ལ་ཤེས་རྟོགས་ལྡན་པའི་སྟེང་ནས་ཛ་དྲག་གི་གདོན་ལེན་བྱ་རྒྱུ་དེ་ཡིན།
འགོ་ཁྲིད་ནུས་རྩལ།
གཏིང་ཟབ་པའི་ཕྱོགས་ལྷུང་དང་གནས་ཚུལ་འཁྱོག་བཤད་ཀྱི་དུས་རབས་འདིར། མི་རབས་གསར་པ་ནས་འགོ་ཁྲིད་ཀྱི་རྐང་འགན་འཁུར་དུ་ལེན་དགོས་པའི་དུས་ལ་སླེབས་ཡོད་ལ། གནད་དོན་འདི་ཉིད་ངོས་འཛིན་བྱས་པའི་ཐོག །༡༠༨ཞི་བདེ་ལྟེ་གནས་ནས་བྱམས་བརྩེ་དང་སྙིང་སྟོབས་ཟུང་དུ་སྦྲེལ་ནས་མིག་དཔེར་འོས་པའི་འགོ་ཁྲིད་ནུས་རྩལ་གཙིགས་སུ་བཟུང་ཡོད། གཞན་ཡང་། འབུམ་རམས་པ་བློ་བཟང་སེང་གེ་མཆོག་གིས་མི་ལོ་བཅུ་ཕྲག་གཅིག་རིང་ཕྱག་ལས་གནང་བའི་ཉམས་མྱོང་ལ་གཞི་བཅོལ་ཏེ། ༡༠༨འགོ་ཁྲིད་ཀྱི་ལས་འཆར་འདིས་གཞོན་སྐྱེས་དང་འཛམ་གླིང་རང་བཞིན་གྱི་སྤྱི་ཚོགས་ལ་སྙིང་རྗེ་གཞི་རྩར་བཞག་པའི་འགོ་ཁྲིད་དང་རིན་ཐང་གཞི་རྩར་བཞག་པའི་འཛིན་སྐྱོང་གི་དཔེ་གཞི་ཞིག་འཁྱེར་ཐུབ་པའི་དམིགས་ཡུལ་བཟུང་ཡོད།
༡༠༨ཞི་བདེའི་གྲངས་འཛིན་གྱི་མྱོང་བ།
གྲངས་འཛིན་འགྲེམས་སྟོན་ཁང་།
གྲངས་འཛིན་འགྲེམས་སྟོན་ཁང་འདི་ནི། ༡༠༨ཞི་བདེ་ལྟེ་གནས་ཀྱི་ལས་གཞི་གཙོ་བོ་ཞིག་སྟེ། གསོན་ཉམས་ལྡན་པའི་གྲངས་འཛིན་འགྲེམ་སྟོན་གྱི་སྡིངས་ཆ་ཞིག་ཡིན་ལ། ལྟེ་གནས་འདི་ཡིས་བརྡ་འཕྲིན་སྣ་ཚོགས་ཀྱི་ནང་དོན་དང་། ལོ་རྒྱུས་རིག་དངོས། སློབ་གསོའི་རྒྱུ་ཆ། གཏམ་རྒྱུད་བཅས་ཆེད་ལས་རང་བཞིན་གྱི་ཐོག་ནས་བསྡུ་རུབ་བགྱིས་པའི་རྒྱུ་ཆ་ཁག་བརྒྱུད། ལྟེ་གནས་འདིས་གལ་ཆེན་དུ་བཟུང་བའི་བརྗོད་དོན་གཙོ་བོ་ཁག་གསོན་ཉམས་ལྡན་པའི་ཐོག་ནས་གསལ་འདོན་བྱས་ཡོད། ང་ཚོས་འཆར་གཞི་དང་ཤུགས་རྐྱེན་རྒྱུས་ལོན་བྱེད་དུ་གསར་བཏོན་རང་བཞིན་གྱི་སྡིངས་ཆ་འདི་ལ་གཟིགས་ཞིབ་གནང་རོགས།
སྨྱན་སྦྱོར།
ནང་དོན་སྣ་ཚོགས་འཛོམས་པའི་ང་ཚོའི་གྲངས་འཛིན་བརྒྱུད་ལམ་གྱི་རྒྱུ་ཆ་ཁག་བརྒྱུད་ནས། ༡༠༨ཞི་བདེ་ལྟེ་གནས་ཀྱི་གསོན་ཤུགས་ལྡན་པའི་གྲངས་མཛོད་ཀྱི་ནང་དོན་ཁག་ལ་གཟིགས་ཞིབ་གནོངས་དང་། འདིའི་ནང་དུ་དངོས་བྱུང་གློག་བརྙན་དང་། བརྙན་མཛོད། པར་མཛོད། པོ་བསྒྲགས་ལེ་ཚན། དེ་བཞིན་སྤྱི་ཚོགས་དྲྭ་རྒྱ་སྣ་ཚོགས་སྟེང་ཚ་ཚ་འུར་འུར་གྱིས་སྤེལ་བའི་བྱེད་སྒོ་ཁག་བཅས་བརྗོད་བྱ་རྒྱ་ཆེན་པོ་ཞིག་བསྡུ་རུབ་བྱས་ཡོད་ལ། གྲངས་འཛིན་གྱི་རྒྱུ་ཆ་རེ་རེ་ཡིས་ང་ཚོའི་ལས་གཞི་དང་དེའི་ཤུགས་རྐྱེན་ཞིབ་ཕྲར་གསལ་བའི་སྒེའུ་ཁུང་མི་འདྲ་བ་རེ་མཁོ་སྤྲོད་བྱེད་ཀྱི་ཡོད།